Freitag, 14. April 2023

Am Morge esches los gange met Zmorge am halbi 9i. Denn hämmer eus ufe wäg gmacht zom Liechtathletikstadion för euse leider scho letschti Trainingstag. Am 10i hämmer denn gestartet metem Training. Es esch es för die einte es Kugelstoss- und för die andere es Mittelstrecke Training ufem Plan gstande. Leider hets weder zemmli grägnet. Das het eus aber ned gross öppis uusgmacht ond mer händ euses Training normal dorezoge. Pflotschnass semmer denn uf di 12i weder zrogg zom Hotel.

Am Nomitag hämmer weder dGruppe ufteilt. Ei Gruppe hed metem Marc, Speer trainiert ond die ander metem Kevin Hochsprung. Obwohl eusi Chräft scho zemmli nocheglo händ, hämmer gliich alli nomol chönne voll vom Training profitiere. Zom Abschluss hed sech au sWätter nochli besseret. Ond mer händ eusi letschti Trainingssession troche dore brocht.

Am Obig hämmer nomol vell Znacht gässe. Nocher semer no alli zäme zäme ghocket ond händ gschnörret ond es Paar Speeli gspellt. Mer händs au am letschte Obig nomol rechtig loschtig ond gmüetlech gha zäme.

So god euses erschte Trainingslager zÄnd. Rückblickend esches wörkli cool gsii. Mer send im Sport wiiter cho, aber au als Gruppe meh zäme gwachse.

~ gschriibe vom Morris

Donnerstag, 13. April 2023

Es isch tagwach, jede isch wie immer sälbständig ufgstande und isch meh oder weniger pünktlich um 08.30 Uhr bim Zmorgebuffet gsi. Es hed jede öppis feins gfunde, womit er de Morge überstah chan. S'Zmorgegspröch isch drum gange, öbs gschiid isch, im Räge Wiitsprung z'mache. Jedoch händ de Kevin und de Marc ned mit sich rede lah. Mit de begründig vo "Räge macht schön.", oder ergend so öppis. Uf de hifahrt, händ die eint oder andere immerno gmotzed, dass jetzt Wiitsprung mache vo hinde und vorne ned intelligänt isch, hed aber alles nüt bracht.

Bim Training sind nachem Iwerme de Kevin und drü anderi ine gange go Chrafttraining mache. Die andere sind in nasse Sand gumped. Mer händ wegem Räge aber defür früener ufgört, weil's denne au am Marc abglöscht het.

S'Zmittag hed allne gschmöckt und s'Dessert isch au fein gsi. D'Erholigsziit isch vo allne unterschidlich gnutzt wurde mit Schlaf, intellektuelem Läse, etc.

Um 14.40 Uhr sind au die meiste wider pünktlich i de Lobby gsi und s'Training hed wie meistens um 15.00 Uhr agfange. Jetzt heds zwar ned grägned, aber defür gwindet. Was aber s'Frisbee spile um einges amüsanter gmacht hed, daher jede zweiti Schuss i die komplett anderi Richtig gfloge als geplant. Suschdige Training isch mit Sprint thematisiert gsi. Ussert die letste 20 Minute, dete händ mir Rumpfstabi g'macht.

I de Erholigsziit händ sich au alli wider plus minus regeneriert und sind ufjedefall parat gsi zum s'Znachtässe i sich ineschufle. Wobi einigi erheblichi Problem gha hed, bim Pouletthüendli usenand neh und ässe.
Ausserdem händ alli ihri Handys i de mitti vom Tisch gstaplet, damit mer ned nur am Handy sind. Aber, to be fair, dete unde gits halt die besti WLAN- Verbindig im ganze Hotel.

De rästlichi abig isch au wider i de Zimmer individuell abglofe.

~ gschriibe vo de Alessia

Mittwoch, 12. April 2023

De hüttig Tag het wie immer mitem umfangriiche Zmorge-Buffet gstartet. Nachher ischs wiiter gange mitem Training. Hüt hemmer Lang- und Mittelstrecke trainiert. Zum afange en 2 km Lauf und denne 300er und 400er. Will mir so schnell gloffe sind, simmer ziemli kaputt gsi und sind deshalb chli früehner zrugg is Hotel. Denn simmer no zumene Iisbad im Pool zwunge wurde. Ganzi 15 Minute hend mir usghalte. Nach dem Chälteschock hend mir eus sZmittag wohl verdient.

Am Nomittag hend mir zur Abwechslig mal en Usflug gmacht. Nachemene Glace-Stopp für de Marc und de Morris simmer is Städtli Grado. Dete hemmer chli chönne umeflaniere. De Kevin het eus allne no es Glace spendiert. Doppleti Portion für de Marc! Nachher sind die einte goh lädele, die andere öppis goh trinke und am 7ni hemmer eus alli im Restaurant troffe. Mmmhhh det hets feini Pinsas geh. Nachdem mir vo de lange Heifahrt weder im Hotel acho sind, simmer alli grad goh pfuuse.

~ gschriibe vo de Julia und Fiona

Dienstag, 11. April 2023

Wo mer uufgwacht send und euses Zmorge gha hend, hend mer eus weder parat gmacht fürs Training. Es isch für de Morge Sprint und Hürde uf em Plan gstande. Während em Training het euse Starfotograf Marc wieder für fantastischi Belder vo eus gsorgt, wo denn au grad weder uf Insta ufegalde worde send.

Well mer nachher alli kaputt gsii send, send mer nach em vellecht zu grosse Zmittag go schlafe.

Am 20 vor 3 send au die meiste wieder pünktlich zum Träffpunkt erschiene, meh, weniger oder ganz verschlafe. Jedefalls het das dezue gfüehrt, dass niemert würkli het möge. Und wäge dem isch sTraining eher liecht uusgfalle mit wiitere 5 Minute Schlaf am Schluss.

Echli früener im Hotel aacho, hend alli gnue Ziit gha zum dusche und nochli schlafe. Die wos hend welle übertriibe, sind no im Pool go es Iisbad neh.

Am 7ni send mer go Znacht esse, wo mer weder mal gnue gha hend. S'Dessert esch das Mal zemlech guet uusgfalle, mer het sich fascht gfühlt wie inere Gelateria. Weder im Zemmer aacho hend die eine "Arschlöchle" gspielt oder sich soscht ergendwie d'Ziit vertriebe. Und nacher send mer all is Guschi go pfuuse.

~ gschriibe vo de Nicole und Lily

Montag, 10. April 2023

Am Morge esches normal los gange met Zmorge am halbi 9i. Denn hämmer eus weder met vell Motivation ufe wäg gmacht zom Liechtathletikstadion. Am 10i hämmer denn gestartet metem Training. Es esch es Wiitsprungtraining ufem Plan gstande. Leider esch de Herr wo eus hetti selle sMaterial zeige emmer nonig zfende gsii. Allerdings hämmers denn gschaft noch es paar Mol telefoniere ihn uusfindig zmache. Dorom esch denn öppe am 11i Au de Herr Galdino zo eus cho ond hed eus dSache zeigt. Das esch vorallem wechtig gsii förs Training am Nomitag. Will es esch es Speerwurf Training aagstande ond das werd ohni Speer no zemmli schwerig.

Wo mer denn am Nomitag weder met frösche Chräft vomene guete Zmittag zom Stadion gfahre send, semmer zersch Mol chli verschrocke. Will de riisigi Parkplatz vorem Stadion wo bis anhin emmer bis uf 3 oder 4 Autos, leer gsii Esch, voll gefüllt gsii Esch.
Nocher bim Speer Training, Hämmer wie Au scho am Morge weder vell chönne verbessere. För es Paar vo eus esches sogar serschte Mol Speer Training gsii. Vorallem die händ scho schnell Gfalle a dere Disziplin gfonde.

Wo mer denn am Obig weder händ welle zrogg fahre Esch es riisigs Getho gsii. Alli wo a dem Ostermentig in Caorle gsii send händ weder welle hei fahre. Vom Parkplatz her hed sech keis Auto bewegt. De Marc ond de Morris händ denn gseid sie laufend die 2 Kilometer lieber zom Hotel zrogg, wie zwarte. Aber chuum send die zwoi gange hends binere nebe stross dEinbahn uufglöst ond de Rescht hed chönne schnell heifahre.

Weder zrogg im Hotel, händ sech zerscht Mol alli chli vom doch zemmli aasträngende Training chli erholt ond sech denn au scho weder parat gmacht förs Znacht.

Am Ändi vo dem Tag send scho alli rächt müed gsii ond dem entsprechend au zemmli früe is Bett.
Im Ganze esches en gute ond lehrriiche Tag gsii, das alles bi aagnehm warme Tamperature ond au ständigem Sonneschiin.

~ gschriibe vom Morris

Sonntag, 9. April 2023

Am achti isch Tagwach gsi und denn sind mer au gli ghas Zmorge-Buffet erkunde. Vo Pancakes, Brötli, Rüehrei bis zu Torte heds alles gha. Natürli hend mer eus chli zrugg ghebt, well schliesslich hed niemert welle, dass da ganze weder obsi chonnt.

Am zehni hed serste Training uf de Aalag stattgfunde. De Senior Galdino, de wo eus alles hetti selle zeige, esch leider nd uffindbar gsi. So hend mer mal die andere uf de Alag gfrogt, doch die hend de au nonie gseh. So hend de Kevin ond de Marc mal so omegluegt, wases hed ond mer hend eus bereits für de Hochsprung iigwärmt.

Nach guete zwei Stund Training hend mer eus denn uf sZmittagesse gfreut. Am eis esch eus denn de ersti Gang serviert worde, bi dem esches aber nd bliibe. Bis am schloss heds ganzi sechs Gäng ghe. Mer hend festgstellt, dass dOstere för dItaliener es sehr grosses Fest isch. Dementsprechend sind au all i Azug oder schöne Kleider cho zMittaggesse. Mer mit eusne Trainingskleider hend eus nor chli underdressed gfühlt.

Well mer zwei Stund am Zmittag esse gsi sind, hed sich sTraining um 1h 30 verschobe. S’Ganze Training hed au chli müesse apasst werde, wells Esse doch no chli im Maage ufgläge isch. Anstell vomene klassische Sprinttraining, heds paar Sprints im Sand ghe. Nachher hend mer eus no im Beachvolleyball versuecht, bis denn dSonne sich verabschiedet hed.

Nochem Dusche semmer denn am achti go Znacht esse. Zom Glöck hets ned eso vell geh wie am Mittag.

Denn hemmer eus alli im Zimmer vom Marc, Kevin und Morris troffe fürs Mentaltraining. De Kevin hed eus zeigt wie es das usgseht und wie mers notze chan.

Am halbi elfi simmer alli go pfuuse.

~ gschriibe vo de Lea und de Melanie